Роналду "Реал"га қайтиши мумкин

Саудия Арабистонининг «Ал-Наср» клуби футболчиси Криштиану Роналду «Реал»га қайтишини истисно қилмади. Бу ҳақда Роналдунинг испаниялик журналист Эдуардо Агиррега берган интервьюсига таяниб, Спорт24 хабар берди.

“Балки фаолиятим тугаганидан кейин нимадир юз бериши мумкин. Мен "Реал Мадрид"да футбол борасида энг яхши вақтларни ўтказдим», деди Роналду.

Роналду 2009 йилдан 2018 йилгача «Реал»да ўйнаган. Жамоа билан бирга икки марта Испания чемпионлигини қўлга киритди, икки марта мамлакат кубоги соҳибига айланди, шунингдек, тўрт марта Чемпионлар лигасида ғолиб чиқди.

Роналду оиласи билан Саудия Арабистонига кўчиб ўтди ва 2023 йилнинг январидан буён «Ал-Наср» ҳужумчиси ҳисобланади. Футболчининг жамоа билан амалдаги шартномаси 2024/25 йилги мавсум охиригача амал қилади. Оммавий ахборот воситаларида томонлар меҳнат шартномасини узайтириш бўйича келишиб олгани ҳақида аллақачон хабар берилган эди. Янги шартнома шартларига кўра, Роналду клубнинг 5 фоиз акцияси эгасига айланади.