Қозоғистон жиноятни тасдиқлади

Қозоғистон Транспорт вазирлигига кўра, Ақтауда ҳалокатга учраган Azerbaijan Airlines самолёти ҳаводалигида “ташқи объектлар” томонидан шикастланган.

Қозоғистон Транспорт вазирлиги Azerbaijan Airlines авиакомпаниясига тегишли Embraer 190 самолётининг 25 декабр куни Ақтау яқинида қулаши бўйича дастлабки ҳисоботни эълон қилди. 53 саҳифалик ҳужжатда ҳалокатнинг дастлабки тергов натижалари келтирилган.

Ҳисоботга кўра, самолётда муаммолар маҳаллий вақт билан соат 05:00 атрофида бошланган. Дастлаб номаълум зарба содир бўлган, унинг сабаби ҳали аниқ эмас. Шундан сўнг автопилот тизими ўчганини билдирувчи овозли сигнал фаоллашган. Кейин самолётнинг бир нечта борт тизимлари қисман ёки бутунлай ишдан чиққан.

"Дастлабки текширув натижаларига кўра, самолётнинг фюзеляжи, дум қисми, вертикал стабилизатори, горизонтал стабилизатори, баландлик ҳамда йўналиш рулида турли ўлчам ва шаклдаги тешиклар ва бошқа турдаги шикастланишлар аниқланди. Худди шундай зарарланишлар чап двигател ва чап қанотда ҳам топилган", — дейилади ҳисоботда.

Ҳужжатда қайд этилишича, самолётда бу шикастланишлар ерга қулашдан олдин пайдо бўлган, ва улар “ташқи объектлар” томонидан етказилган бўлиши мумкин. Аниқлик киритиш учун қўшимча экспертиза ўтказилади. Azerbaijan Airlines самолёти ҳалокатининг расмий сабаблари ҳали эълон қилинмаган.

Euronews ва Reuters маълумотларига кўра, авиаҳалокатга Россиянинг ҳаво ҳужумидан мудофаа тизими сабаб бўлган.

Россия президенти Владимир Путин самолёт қулаганидан кейин тез орада Озарбойжон президенти Илҳом Алиев билан телефон орқали гаплашиб, "Россия ҳаво ҳудудида юз берган фожиали ҳодиса" учун узр сўраган. Алиев эса Россия самолёт ҳалокати бўйича ўз айбини тан олиши кераклигини таъкидлаган.