Мисрлик полвон 700 тоннали кемани тишлари билан тортди

Мисрлик 44 ёшли курашчи Ашраф Маҳруз 700 тонна оғирликдаги кемани тиши билан 15 метргача тортиб борди. Спортчи ушбу натижасини қайд этиш учун Гиннесснинг рекордлар китобига ариза топширмоқчи, деб хабар берди NBC News.

Маҳрузнинг айтишича, Гиннесснинг рекордлар китобида қайд этилган охирги рекордда 614 тоннали кема қатнашган. У ўз кўрсаткичи исботи сифатида фото ва видеоларини юборишни режалаштирмоқда.

Янги рекорд ўрнатишга тайёргарлик кўриш жараёнида спортчи оқсил ва темир моддасига бой таомларни кўп истеъмол қилди. Хусусан, кунига камида 12 та тухум, иккита бутун товуқ ва 5 кг атрофида балиқ тановул қилган. Машқларни эса кунига уч маҳал, икки соатдан бажарди.

Маҳруз кемалардан ташқари, машиналар, поезд ва локомотивни жойидан қўзғатган, шу йил мартида 279 тоннали темир йўл вагонларини жойидан силжитиб, Гиннеснинг рекордлар китобига кирган эди.