Месси бу кўрсаткич бўйича Роналдиньони ортда қолдирди. Олдинда Пеле ва Пернамбукано

"Интер Майами" ҳужум чизиғи етакчиси Лионель Месси жарима зарбасидан тўғридан-тўғри гол урди.

37 ёшли ҳужумчи МЛСнинг "Филадельфия Юнион"га (3:3) қарши ўйинида рақиб дарвозасини ишғол қилди. Inter Miami News Hub хабарига кўра, энди Месси жарима зарбаларидан урилган голлар сони бўйича тарихдаги учинчи ўринни эгаллаб турибди - 67. Аргентиналик ушбу рейтингда Роналдиньони (66) ортда қолдирди. Ундан юқорида фақат Пеле (70) ва Жунино Пернамбукано (77) жойлашган.

Лионель Месси 2023 йилнинг ёзидан бери "Интер Майами" шарафини ҳимоя қилмоқда. Ҳужумчи АҚШга кетишидан олдин "Пари Сен-Жермен" ва "Барселона" шарафини ҳимоя қилган. Июнь ойида саккиз карра "Олтин тўп" соҳиби 38 ёшга тўлади.