Мбаппе қўпол қоидабузарлик учун майдондан четлатилгандан сўнг «Алавес» футболчисидан узр сўради

Мадриднинг «Реал» жамоаси ҳужумчиси Килиан Мбаппе Испания Ла Лигасининг 31-туридан ўрин олган учрашувда (1:0) майдондан четлатилди. У «Алавес» яримҳимоячиси Антонио Бланкога жароҳат етказиб қўйди. Бунинг учун эса франциялик футболчи рақиб футболчисидан узр сўради. Бу ҳақда Marca нашри хабар берди.

Манба маълумотига кўра, учрашувдан сўнг Мбаппе Бланкони топиб, ундан узр сўраган ва соғлиги ҳақида сўрашга қарор қилган.

Эслатиб ўтамиз, учрашувнинг 39-дақиқасида мадридликлар ҳужумчиси Килиан Мбаппе рақибга нисбатан қўпол фол қилади. Ҳакам аввалига унга сариқ карточка кўрсатди, бироқ VAR орқали ҳолатни кўриб чиққанидан сўнг, футболчини қизил карточка билан майдондан четлатди.

31-турдан сўнг «Алавес» жамоаси 30 очко тўплаб, турнир жадвалида 17-ўринни эгаллаб турибди. «Реал» эса шунча учрашувдан сўнг 66 очко билан 2-ўринда бормоқда. 2024/2025 йилги Испания чемпионатида пешқадамликни 70 очкога эга «Барселона» эгаллаб турибди.