Мбаппе нечта ўйинга четлаштирилиши мумкин?

«Реал» Ла Лиганинг 32-туридан ўрин олган ўйинда «Алавес» устидан 1:0 ҳисобида ғалаба қозонди.

Баҳснинг 38-дақиқасида «Реал» ҳужумчиси Килиан Мбаппе майдон марказида тўп учун кураш чоғида Антонио Бланконинг болдирига бутсасининг шиплари билан зарба берди. Бош ҳакам Сесар Сото Градо аввалига унга сариқ карточка кўрсатди, бироқ видеотакрорни кўриб чиққанидан сўнг қарорини ўзгартирди ва франциялик футболчини қизил карточка билан майдондан чиқариб юборди.

COPE журналисти Исаак Футо хабарига кўра, Мбаппе фақатгина 1 та ўйинга дисквалификация қилинади. У чемпионатнинг навбатдаги турида «Атлетик»ка қарши бўладиган ўйинда майдонга тушмайди.