Ким Чен Иннинг синглиси Binance криптобиржасидан 6,3 миллиард доллар ўғирлангани ҳақидаги айбловларни рад этди

Шимолий Корея етакчиси Ким Чен Иннинг синглиси Ким Ё Чжон мамлакатнинг Binance криптовалюта биржасига киберҳужум уюштиргани ва ундан 6,3 миллиард долларлик активларни ўғирлагани ҳақидаги айбловларни рад этди.

Шимолий Кореянинг давлат ахборот агентлиги KCNA хабар беришича, Ким Ё Чжон АҚШнинг бу борадаги айбловларини асоссиз деб атаган. Унинг таъкидлашича, бундай даъволар Вашингтоннинг Пхеньянга нисбатан давом этаётган душманона сиёсатини кўрсатади.

Аввалроқ АҚШ Федерал қидирув бюроси (ФҚБ) дунёдаги энг йирик криптовалюта платформаларидан бирига ҳужум ва маблағларни ўғирлаш ортида Шимолий Корея ҳукумати билан алоқадор бўлган TraderTraitor хакерлар гуруҳи турганини маълум қилган эди.

Ҳодисадан кейин Binance мижозлари биржадан маблағларини оммавий равишда ечиб ола бошлаган. Душанба кунига қадар платформадаги ҳисоблардан 4,72 миллиард доллар чиқариб олинган. Бироқ биржа раҳбарияти молиявий аҳвол барқарорлигини билдириб, мижозлар учун маблағ ечиб олиш имкониятини сақлаб қолган.

Блокчейн таҳлиллари билан шуғулланувчи Chainalysis компанияси маълумотларига кўра, 2026 йилда бутун дунёда хакерлар томонидан ўғирланган криптоактивларнинг 89 фоизи Шимолий Корея билан боғлиқ. Компания ҳисоботида сўнгги беш йилда битта киберҳужумдан кўрилган ўртача зарар 50,65 миллион доллардан 185,65 миллион долларгача ошгани қайд этилган.

Elliptic тадқиқотчилари эса Шимолий Корея хакерлари жорий йилда 7,6 миллиард долларлик криптовалютани ўғирлаганини билдирган. Таҳлилчилар Пхеньян бундай ҳужумлар орқали ўзининг қурол-яроғ дастурларини молиялаштираётганини тахмин қилмоқда.

Жанубий Корея Марказий банки маълумотларига кўра, Шимолий Кореянинг ялпи ички маҳсулоти 2025 йилда 47,18 триллион вон ёки 35,09 миллиард долларни ташкил этган. Бу Binance биржасидан ўғирлангани айтилган маблағ мамлакат ялпи ички маҳсулотининг қарийб олтидан бир қисмига тенг эканини англатади.