Кеннеди оиласи Дональд Трамп маъмурияти илгари сураётган баландлиги 250 фут (тахминан 76 метр) бўлган тантанали арка қурилишини тўхтатиш талаби билан Вашингтондаги федерал судга даъво аризаси киритди.
Бу ҳақда CNN телеканали маълум қилган.
Даъвогарлар сифатида оиланинг тўққиз нафар аъзоси қатнашмоқда. Уларнинг таъкидлашича, арка Арлингтон миллий қабристонида дафн этилган қариндошларининг қабрлари, жумладан, Жон Кеннедининг абадий ёниб турувчи олови, шунингдек, юз минглаб ҳалок бўлган америкалик ҳарбийлар хотирасига бағишланган ёдгорликларни кўришга тўсқинлик қилади.
Оиланинг баҳолашича, иншоот Линкольн ёдгорлигидан икки баравар баланд бўлиб, майдони жиҳатидан 25 қаватли офис биносига тенг. Шунингдек, улар маъмурият қурилиш ишларини шошилинч бошлаганини таъкидламоқда.
Кеннеди оиласи ўтган ойда Вашингтон ва Виржиния маъмуриятлари, шунингдек, фахрийлар ҳамда Арлингтон округи томонидан киритилган даъвога қўшилди.
Даъвогарлар манфаатларини ҳимоя қилаётган Демократияни ҳимоя қилиш жамғармаси адвокатлари Норман Эйзен ва Стив Жонаснинг таъкидлашича, арка қурилиши қабристон ишларига ва қаҳрамонлар хотирасига ноқонуний аралашув ҳисобланади. Уларнинг фикрича, бундай кўламдаги қурилишга фақат Конгресс рухсат бериши мумкин.
Ўтган ҳафта федерал судья арка қурилишини 14 кунга тўхтатиб, иншоот ўрнатилиши режалаштирилган ҳудудда ҳар қандай ишларни амалга оширишни тақиқлади.
Трамп лойиҳани икки йилдан кейин президентлик лавозимини тарк этишидан олдин якунлашни режалаштирган эди. Бироқ суд жараёнлари қурилиш муддатларига таъсир кўрсатди.
Ўзбекистонда кескин совуқ ва кучли ёғингарчилик кутилмоқда
Эркинжон Турдимов бешта ректорни ишдан бўшатди
Чақалоғини ҳожатхонага ташлаган аёлга 3 йиллик жазо тайинланди
