Испанияда поездлар ҳалокатли тўқнашувидан олдин сигнализация тизимида носозлик юз берган ва диспетчерлик маркази ҳаракатни қайта тиклашга қарор қилган.
The Guardian нашри хабар беришича, бу ҳақда Испания транспорт вазири Оскар Пуэнте маълум қилган. У ҳодисалар кетма-кетлигини тикланган ҳолда баён қилиб, поездлар ва диспетчерлик маркази ўртасидаги музокаралар ёзувларини тақдим этган.
Вазирнинг сўзларига кўра, маҳаллий вақт билан тахминан соат 08:30 да алоқа билан боғлиқ муаммолар сабабли LZB поездлар ҳаракатини бошқариш тизимида носозлик юз берган. Натижада узунлиги 60 километрдан бироз ортиқ бўлган темирйўл участкасида тизим назорати йўқолган. Бу эса олтита поезднинг автоматик равишда тўхташига олиб келган.
Бироқ маҳаллий вақт билан тахминан соат 08:36 да Adif диспетчерлик маркази огоҳлантиришни бекор қилиш ва поездлар ҳаракатини қайта тиклаш бўйича қўлда бошқариладиган буйруқ берган. Вазир бундай қарор қабул қилинмаслиги кераклигини таъкидлаган.
Кейинги 25 дақиқа давомида иккинчи AVE поезди 25 километр масофани босиб ўтган ва шундан сўнг ҳаракатсиз турган Iryo поезди билан тўқнашган.
Пуэнтенинг қайд этишича, Испания темирйўл тармоғида поездларнинг орқадан келиб тўқнашиши кам учрайдиган ҳодиса ҳисобланади. У ҳалок бўлганларнинг оилаларига ҳамдардлик билдириб, содир бўлган воқеани ҳаётидаги энг оғир дамлардан бири деб атаган.
Испаниядаги темирйўл ҳалокати Толедо провинциясидаги Урда станцияси яқинида Renfe ва Iryo поездлари тўқнашиши оқибатида содир бўлган. Сўнгги маълумотларга кўра, камида 64 киши ҳалок бўлган.
Сунъий интеллект дунёдаги энг қиммат сурат муаллифлигини шубҳа остига қўйди
Ўзбекистон Самарқанд ҳақидаги баёнотлар сабаб Эронга норозилик нотаси топширди
АҚШнинг Россия бўйича қарори Киевнинг умидларини пучга чиқарди
