Пентагоннинг махфийлиги очилган ҳужжатларидан бўри-одам ҳақидаги ҳисобот топилди (фото)

Пентагоннинг махфийлиги очилган ҳужжатларининг навбатдаги тўпламидан АҚШнинг Юта штатида пайдо бўлган сирли бўри-одам ҳақидаги ҳисобот аниқланди.

VT.co нашри хабар беришича, АҚШ Мудофаа вазирлиги топшириғига кўра, ушбу ҳолат 2010 йилда фаолияти ҳозирда тўхтатилган хусусий аэрокосмик компания — Bigelow Aerospace Advanced Space Studies (BAASS) томонидан текширилган.

Ҳарбийлар Форт-Дюшен аҳолисининг Скинуокер ранчоси атрофида жун билан қопланган ғалати жонзотни кўргани ҳақидаги хабарларига қизиқиш билдирган.

Ҳисоботда бўри-одам деб аталган жонзотни кўрганини айтган 25 нафар гувоҳ, жумладан, полиция ходимлари унинг бўйи тахминан 1,8 метр, вазни эса 110 килограммдан ортиқ бўлганини билдирган.

Гувоҳларнинг таърифлашича, жонзотнинг калта қора-кулранг жуни, учли қулоқлари ва калта думи бўлган. Боши немис овчаркасига ўхшаган, аммо бурни инсонникини эслатган. Гўёки, у жуда катта тезликда сакраб ҳаракатланган.

Ҳисоботда келтирилган воқеалардан бирида жонзот тиканли симдан ясалган тўсиққа бориб урилган ва шундан сўнг ғайритабиий увиллаш овозини чиқарган.

Сирли ҳайвоннинг жун толалари тўсиқда қолган ва маҳаллий аҳоли уларни BAASS мутахассисларига топширган. Компания ходимлари жун намунасини ДНК таҳлилидан ўтказиб, уни маҳаллий итлардан бирига тегишли деган хулосага келган.

Бироқ мутахассислар бу натижа фақат текширилган жун намунасининг келиб чиқишини кўрсатишини, «бўри-одам» аслида ит бўлганини исботламаслигини таъкидлаган. Пентагон ушбу ҳодиса юзасидан расмий хулоса чиқармаган.

Бундан ташқари, Форт-Дюшен атрофида яшовчилар BAASS вакилларига бу ҳудудда олов шарлари ва қандайдир кичик одамсимон мавжудотлар пайдо бўлиши, ҳатто баландлиги 12 метрга етадиган «бошқа оламга олиб борувчи портал» очилгани ҳақида ҳам гапириб беришган.

Ушбу хабарлар бўйича ҳам ҳеч қандай расмий хулоса берилмаган.