АҚШ Путинга тинчлик эвазига Европага газ сотишни қайтаришни таклиф қилди

21 октябрь куни АҚШ махсус вакили Стив Уиткофф Санкт-Петербургда Владимир Путин билан учрашди. Ушбу учрашувдан сўнг Путиннинг маслаҳатчиси Юрий Ушаков Россия ноябрь ойида Украина ва АҚШ билан музокараларни қайта бошлашга тайёрлигини маълум қилди. New York Times (NYT) нашрининг маълумотларига кўра, Вашингтон томонидан илгари сурилган таклифнинг асосий шартларидан бири «тинчлик эвазига газ» тамойилига асосланган.

NYT хабарига кўра, Уиткофф ва Трампнинг куёви Джаред Кушнер Украина орқали Россия ва Европани боғлайдиган газ қувурларини қайта ишга туширишни таклиф қилмоқда. Ушбу режага мувофиқ, Путин тинчлик шартномасига рози бўлиш эвазига миллиардлаб доллар даромад олади, Киев транзит тўловларига эга бўлади, Европа эса арзонроқ газ билан таъминланади. Кремль матбуот котиби Дмитрий Песков Россия исталган шаклдаги энергетик ҳамкорликни қайта тиклашдан манфаатдор эканини билдирди.

Киевдаги Европа сиёсати институти (EPIK) эксперти, доктор Андреас Умланд BILD нашрига берган интервьюсида таъкидлашича, Украина урушни зудлик билан тўхтатиш учун ҳатто Россия билан газ транзити бўйича мажбурий ҳамкорликни қайта тиклашга ҳам рози бўлиши мумкин.

Аммо бу режани амалга оширишда жиддий тўсиқлар мавжуд: Европа Иттифоқи Россия гази импортига чекловлар киритган. ЕИ суюқлантирилган газни (СНГ) 2026 йил охиридан, қувур орқали келувчи газни эса 2027 йил 1 ноябридан кечиктирмай сотиб олишни бутунлай тўхтатиш мажбуриятини олган.

Бонн университетининг энергетика хавфсизлиги бўйича эксперти, доктор Франк Умбахнинг қайд этишича, Европа ҳозирда Россия газига муҳтож эмас ва арзон газ таклифи ортида Москванинг геосиёсий талаблари ва сиёсий қарамлик хавфи яширинган.

Шунингдек, доктор Умланд молиявий манфаатлар Путинни тинчлик тузишга ундай олишига шубҳа билан қарайди. Унинг фикрича, Москва учун геосиёсий ва экспансион мақсадлар биринчи ўринда туради, иқтисодий фойда эса иккинчи даражалидир. Шу сабабли, ноябрь ойида кутилаётган музокаралардан катта натижалар кутилмаяпти.