Исломобод ва Кобул ўртасидаги музокаралар натижа бермади

Покистон ва Афғонистон расмийлари ўртасида чегарадаги вазиятни тартибга солиш бўйича сўнгги музокаралар яна натижа бермади.

Бу ҳақда Dawn нашри хабар берди.

Саудия Арабистони воситачилигида 30 ноябрь куни Ар-Риёдда Покистон ва Афғонистон ўртасида ёпиқ эшиклар ортида ўтказилган музокаралар икки давлат ўртасидаги муносабатларни нормаллаштиришда муваффақиятга эриша олмади. Томонлар ҳеч қандай мослашувчанлик кўрсатмади ва трансчегаравий терроризм масаласида муроса қилишдан бош тортди. Музокаралар чоғида Покистон Саудия Арабистонининг Афғонистон билан чегара савдосини тиклаш таклифини рад этди, деб ёзади нашр.

Покистоннинг Афғонистон билан савдо алоқаларининг истиқболлари бўйича позициясини тушунтирар экан, Бош вазир ўринбосари ва ташқи ишлар вазири Ишоқ Дар Исломобод яқин орада мамлакатга зарур озиқ-овқат маҳсулотларини етказиб беришга рухсат бериши мумкинлигини, бироқ фақат БМТ илтимосига кўра эканлигини таъкидлади. Унинг сўзларига кўра, “Исломобод Афғонистонга гуманитар ёрдам кўрсатишга ижобий ёндашганига қарамай, Кобул афғон заминида ҳаракат қилаётган ва Покистонга ҳужум қилаётган террорчиларга қарши ҳеч қандай чора кўрмаяпти”.

2025 йил октябрь ойида Покистон-Афғонистон чегарасида қуролли тўқнашувлар бўлиб ўтди, бу 2021 йилда Кобулда Толибон ҳаракати ҳокимият тепасига келганидан бери энг қонли тўқнашув бўлди. Улар Покистон чегара постларига қилинган ҳужумлардан сўнг бошланди, бунга Покистон Ҳарбий-ҳаво кучлари жавобан Афғонистондаги “Фитна ал-Хавориж” террорчилик базаларига зарба берди. Афғонистон ҳукумати матбуот котиби ўринбосари Ҳамдуллоҳ Фитрат 12 киши ҳалок бўлгани ва 100 дан ортиқ яраланганини маълум қилди. Қатар ва Саудия Арабистони воситачилигида можаро томонлари ўша ойнинг ўзида вақтинчалик ўт очишни тўхтатиш тўғрисида келишувга эришдилар ва у амалда қолмоқда.