Индонезия қирғоқлари яқинида паром ҳалокати оқибатида ҳалок бўлганлар сони 78 кишига етди

Индонезия қирғоқлари яқинидаги Ява денгизида йўловчи кемасининг чўкиши оқибатида ҳалок бўлганлар сони 78 кишига етди.

Бу ҳақда мамлакат Миллий қидирув-қутқарув агентлиги хабар бермоқда.

Қутқарув гуруҳлари бедарак йўқолган 57 кишини қидирмоқда, яна 108 киши эса хавфсиз тарзда эвакуация қилинди.

243 йўловчини олиб кетаётган Virgo Transport 8 кемаси 12 сентябрь куни Шарқий Явадаги Сурабаядан Жанубий Калимантандаги Банжармасинга йўл олди. Кема билан алоқа 13 сентябрь куни ёмон об-ҳаво туфайли узилди.

Қутқарувчилар кема вайроналари остидан ва Марказий Калимантан провинсияси қирғоқлари бўйлаб жасадларни топдилар.