Ҳусийлар Яман ҳукумат кучларига қарши ҳужум қилди, 45 киши ҳалок бўлди

Яман расмийлари Ҳусийлар ҳаракатининг ҳукумат ҳарбий лагерларига ҳужумлари натижасида 45 киши ҳалок бўлганини хабар қилишди.

Бу ҳақда Яқин Шарқ оммавий ахборот воситалари хабар бермоқда.

Таъкидланишича, ҳужумлар Мариб ва Ҳадрамаут вилоятларидаги фавқулодда вазиятларга жавоб бериш кучлари базаларига ракеталар ва дронлар ёрдамида амалга оширилган.

Яманнинг халқаро миқёсда тан олинган ҳукумати кучлари ҳам Мариб ҳаво ҳудудида ҳаракатланаётган Ҳусийлар дрони уриб туширилгани ҳақида хабар беришди. Расмийларнинг сўзларига кўра, ҳаво мудофааси тизими самолёт шаҳар ҳаво ҳудудига киргандан кейин уни йўқ қилган.

Ҳукумат кучлари ва Ҳусийлар ўртасидаги жанглар июль ойининг бошидан бери кучайиб бормоқда. Яманда 2022 йил апрель ойидан бери нисбатан сукунат давом этмоқда. Ҳусийлар 2014 йил сентябридан бери пойтахт Сано ва мамлакатнинг бошқа бир қатор ҳудудларини назорат қилиб келмоқда.