Мазкур хабар юзасидан “Ҳудудий электр тармоқлари” АЖ қуйидагиларни маълум қилади:
“Ўзбекистон Республикаси Вазирлар Маҳкамасининг “Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида”ги 2024 йил 16 апрелдаги қарорига асосан электр энергияси ва табиий газ бир ойлик истеъмолининг базавий меъёрлари тасдиқланган.
Шунга кўра, эндиликда бир ойда 200 киловаттгача электр энергияси ишлатган хонадон эгаси 1 киловатт соат учун 450 сўмдан тўлайди. Истеъмол мазкур кўрсаткичдан ошса, яъни 1000 киловатт соатгача ишлатилган бўлса 200 киловатт соатгача – 450 сўм, қолган 800 киловатт соатга – 900 сўмдан тўлов қилинади.
Мазкур ўсувчи тарифларни ҳисоблашда электр энергияси сарфи кунлик истеъмол миқдорида эмас, балки истеъмолчининг бир ой давомидаги кўрсаткичи асосида ҳисобланишини маълум қиламиз.
Мисол учун, истеъмолчи бир ойда 300 киловаттгача электр энергияси ишлатган бўлса, хонадон эгаси 200 киловаттга 1 киловатт соат учун – 450 сўм, қолган 100 киловатт соат учун 900 сўмдан тўлайди.
2024 йил 1 июндан истеъмолчиларга фойдаланилган электр энергияси ва табиий газ бўйича ойлик маълумот “базавий меъёр” ва ундан ортиқ ҳажмлар кесимида юборилади.
Ижтимоий тармоқларда тарқатилаётган “...кунига 6.6 кВтдан ортиқ ток ишлатсангиз, ундан ортганига қиммат тарифда тўланади”, деган хабарлар мутлақо асоссиз эканини таъкидлаган ҳолда, янгилик каналлари админларидан бундай ёлғон маълумотларни тарқатмасликларини сўраб қоламиз.
Шу ўринда, истеъмолчилардан электр энергияси бўйича саволлар ёки тушунмовчиликлар бўлса, туман электр таъминоти корхонасига ёки “Ҳудудий электр тармоқлари” АЖнинг 1154 қисқа рақамли Call-марказига ҳамда телеграм ижтимоий тармоғидаги “Hududiy elektr tarmoqlari” AJ bilan мулоқот” каналининг админига мурожаат қилишларини сўраймиз.
“Ҳудудий электр тармоқлари” АЖ мазкур тарқатилган асоссиз маълумот юзасидан тегишли тартибда ҳуқуқни муҳофаза қилиш органларига мурожаат қилишини маълум қилади.