Ҳиндистондаги сув тошқинлари қурбонлари сони 66 нафарга етди

Ҳиндистоннинг Ассам штатида сув тошқинлари оқибатида ҳалок бўлганлар сони 66 кишига етди.

Бу ҳақда Ассам штати табиий офатларни бошқариш бошқармаси (ASDMA) баёнот берди.

Таъкидланишича, олтита туманда 655 000 дан ортиқ одам табиий офатдан жабр кўрган.

ASDMA маълумотларига кўра, шанба куни тўрт киши ҳалок бўлган - учтаси Сивасагарда ва биттаси Чараидеода. Сивасагар тумани сув тошқинларидан энг кўп зарар кўрган.

Ҳукумат кўмагида олтита туманда 274 та лагерь ва ёрдам марказлари ташкил этилди, улар сув босган уйлар туфайли кўчирилган 18 902 кишига ёрдам кўрсатди. Сўнгги маълумотларга кўра, 810 та қишлоқ сув остида қолган ва Ассам бўйлаб 34 970,8 гектар экин майдонлари, шунингдек, дарё қирғоқлари, йўллар, кўприклар ва бошқа инфратузилма зарар кўрган.