Ҳиндистонда бортида 232 нафар йўловчи бўлган самолёт двигатели ёниб кетди

Ҳиндистоннинг Нью Деҳли аэропортида бортида 232 нафар йўловчи бўлган самолёт двигатели ёниб кетди. Бу ҳақда The Times of India хабар берди.

Ҳодиса Swiss Airlines (Швейцария)га тегишли LХ0147 рейси ҳавога кўтарилиш учун тезликни ошираётган пайтда содир бўлган. Дастлаб двигателлардан бири ишламай қолган, шундан сўнг унда ёнғин чиққан.

Экипаж парвозни тўхтатган ва эвакуация қилиш тўғрисида қарор қабул қилган. Бортда 232 нафар йўловчи, жумладан, тўрт чақалоқ, шунингдек, экипаж аъзолари бўлган. Улардан олти нафари жароҳат олган ва касалхонага ётқизилган. Воқеадан сўнг учиш-қўниш йўлаги ёпилган.

Swiss Airlines авиакомпанияси воқеа ҳақида хабардорлигини, ҳозирда двигатель ишдан чиқиши ва ёнғин сабаблари текширилишини маълум қилди. Ҳиндистонга вазиятни аниқлаш учун техник мутахассислар юборилади.