Ҳиндистон Туркманистон ва Тожикистонга ҳаво мудофааси тизимларини етказиб берди

Ҳиндистон Akash-1S қисқа масофага мўлжалланган ҳаво мудофааси тизимларини Тожикистон ва Туркманистонга экспорт қилди. Бу ҳақда 18 сентябрь куни Kyrgyz Militarist Telegram-канали Ҳиндистон Мудофаа тадқиқотлари ва ишланмалари ташкилоти (DRDO)нинг собиқ раҳбари доктор Самир В. Каматга таяниб хабар берди.

DRDO томонидан ишлаб чиқилган ва Bharat Dynamics Limited компанияси томонидан ишлаб чиқариладиган ушбу тизим 25 километргача масофада ва 18 километргача баландликдаги нишонларни йўқ қилиш имкониятига эга. У дронлар, самолётлар ва вертолётларга қарши қўллаш учун ишлаб чиқилган.

Ҳар икки давлат ҳам илгари анъанавий равишда Россия қурол-яроғларидан фойдаланиб келган. Янги етказиб беришлар Марказий Осиёнинг бошқа давлатлари каби Тожикистон ва Туркманистон ҳам мудофаа маҳсулотлари етказиб берувчиларини диверсификация қилишга интилаётганини кўрсатади.

Туркманистон ва Тожикистон Ҳиндистоннинг Арманистон билан тузган келишувидан кейин Akash-1S тизимига қизиқиш билдирган. 2024 йилда Арманистон Akash-1S тизимининг биринчи хорижий харидори бўлган. Тизимнинг муваффақиятли равишда қуролланиш жараёнидан ўтиши бошқа давлатларни ҳам унга қизиқиш билдиришга ундаган.