АҚШ президенти Жо Байденнинг айтишича, Флорида штати қирғоқларига яқинлашиб келаётган "Милтон" довули сўнгги юз йилликда бу ҳудуддаги энг вайронкор довуллардан бирига айланиши мумкин.
"Худо сақласин, бундай бўлмасин, лекин ҳозирги вазият айнан шундай кўринмоқда", - деди у маҳаллий аҳолини хавфсиз жойларга кўчишга чақириб. "Бу ҳаёт-мамот масаласи".
Кеча "Милтон" тўфони максимал - бешинчи тоифага кўтарилди. Мутахассислар Флорида қирғоқлари учун эҳтимолий ҳалокатли оқибатлар ҳақида огоҳлантиришди. Сешанба кунининг ўрталарига келиб, довул бироз кучсизланди ва шамол тезлиги соатига 250 км дан ошмайдиган олдинги, тўртинчи тоифага ўтказилди, аммо кейин яна бешинчи тоифага кўтарилди. Довул марказидаги доимий шамол тезлиги 270 км/соатни ташкил этади ва янада кучли бўлиши мумкин.
Яқинлашиб келаётган "Милтон"дан бир неча ҳафта олдин АҚШ қирғоқларида ҳалокатли "Хелен" тўфони содир бўлди. Унинг қурбонлари 200 дан ортиқ бўлиб, бу кўрсаткич бўйича у 2005 йилда Луизиана штатида деярли 2000 кишининг ҳаётига зомин бўлган "Катрина"дан орқада қолмоқда.
