Германиянинг Бонн шаҳри ва унинг атрофида Германия канцлери Олаф Шольц ва Россия президенти Владимир Путиннинг тасвирлари туширилган сайлов плакатлари пайдо бўлди. Ушбу баннерларни кичик сиёсий ташкилот Die Partei («Партия») чиқарган. Улар 23 февраль куни бўлиб ўтадиган бундестагга муддатидан аввалги сайловлар кампанияси доирасида январь ойидан бошлаб жойлаштирила бошланди.
Плакатларда шундай ёзувлар бор:
«Германиянинг энг кучли овозлари Европа учун»
«Die Partei'га овоз беринг – Европани ҳаваскорларга қолдирмаймиз!»
Иккинчи жумлада «die Laien» сўзи ишлатилган бўлиб, у «ҳаваскорлар» деган маънони англатади. Шу билан бирга, бу сўз шаклан Еврокомиссия раиси Урсула фон дер Ляйеннинг фамилиясига ўхшаш қилиб бузиб ёзилган.
Die Partei нима учун Путин плакатларини жойлаштирди?
Die Partei'нинг Бонн бўлими DW нашрига тушунтириш бериб, бу плакатлар ирония ва Олаф Шольц сиёсатига танқид эканини билдирди. Партия вакиллари Путинни ҳақоратли сўз – «пасткаш» деб атаган ва уни «босқинчилик урушини бошлашда» айблаган.
Уларнинг фикрича, Шольц олиб бораётган сиёсат Путин фойдасига ишламоқда, чунки Россия президенти Европа Иттифоқига қарши сиёсат юритмоқда. Die Partei бу плакатлар фақат Бонн шаҳрида жойлаштирилганини, Германия бўйлаб тарқатилмаганини таъкидлади.
Die Partei сайловолди кампанияларида кескин киноя ва ҳазил ишлатиши билан машҳур. Жорий йилдаги шиорлардан баъзилари:
«Германиясиз Учинчи Жаҳон уруши бўлмайди!»
«Die Partei'га овоз беринг, у жуда яхши!»
Ҳозирда Die Partei Германия бундестагида ҳам, мамлакатнинг бирорта ер парламентида (ландтаг) ҳам вакилликка эга эмас. Фақатгина 2020-2021 йилларда ушбу партиянинг ягона депутати Марко Бюлов бундестагда фаолият юритган. Бироқ Die Partei Европа парламентида икки депутатга эга.
Россияликлар Исрoилга рекорд даражада кўчмоқда
Россия банклари рекорд даражада даромад олди
Чеченистонда Қодировнинг "йўқолиши" ҳақидаги хабарларга муносабат билдирилди
