Германия ТИВ: "Аввалги ҳукумат ҳам Исроилга қурол етказиб берган, биз ҳам шундай қиламиз"

Германия ташқи ишлар вазири Йоханн Вадефуль Исроилга қурол-яроғ етказиб беришда чекловлар мавжудлигини истисно этмади.

У бу ҳақда Die Zeit газетасига берган интервьюсида маълум қилган.

"Мен ҳар доим айтганман, принципиал жиҳатдан биз Исроилга қурол етказиб берамиз. Германиянинг олдинги ҳукумати етказиб беришни қисқартирган, мен буни ўша пайтда тўғри деб ҳисобламаганман. Германиянинг биринчи канцлери Конрад Аденауэрдан бошлаб барча ҳукуматлар Исроилга қурол етказиб берган ва биз, албатта, шундай қилишда давом этамиз", - деди Вадефуль.

Унинг сўзларига кўра, Германиянинг бу қўллаб-қувватлаши "шубҳасиз, Германиянинг Исроилнинг мавжуд бўлиш ҳуқуқига содиқлигидан келиб чиқади". "Шунга қарамай, чекловлар бўлиши мумкин. Яна бир бор айтаман: таъминот бўйича қарорлар мазмуни махфийдир" - деди Германия ТИВ раҳбари.

Шу билан бирга, у Ғазо секторидаги вазият ёмон томонга ривожланаётганини таъкидлади. "Шунинг учун мен бошиданоқ Ғазо аҳолисининг аҳволи яхшиланишини талаб қилганман. Исроил ҳукумати инсонпарварлик ёрдамини нафақат қоғозда, балки ҳақиқатда азоб-уқубатларни энгиллаштирадиган тарзда кўрсатишга мажбур. Менинг биринчи ташрифим билан деярли бир вақтда ташкил этилган Ғазо гуманитар ёрдам жамғармаси бунинг учун етарли эмас", - деди вазир.

Аввалроқ, DPA агентлиги Германия ҳукумати Исроилга 2023 йил 7 октябрдан 2025 йил 13 майгача 485,1 миллион евролик қурол ва ҳарбий буюмлар етказиб беришни маъқуллагани ҳақида хабар берган эди. Бироқ, СДУ/ССУ ва СПД блокидан иборат янги немис ҳукумати 2025 йил 6 майдан кейин электр энергиясини экспорт қилишга рухсат берганми ёки йўқми, аниқ эмас.