Германия молия вазири: Биз энди Россия энергетикасига қарам эмасмиз

Германия энди Россия энергетикасига қарам эмас, деб таъкидлади мамлакат молия вазири Кристиан Линднер BBC га берган интервьюсида.

"Россия Украинага бостириб кирганидан кейин Германия энергетика инфратузилмасини бутунлай диверсификация қилди. Москва Европа томон газ қувурини узганига қарамай, Берлин энергия импортининг янги манбаларини топди", — дейди Линднер.

Унинг сўзларига кўра, Германия ҳамон энергия импортига қарам, аммо бугун у Россиядан импортга эмас, балки жаҳон бозорларига қарам бўлиб қолган.

Илгари Германия Россиядан истеъмол газининг ярмини ва барча нефтнинг учдан бир қисмидан кўпроғини импорт қилган. Россия август ойида мамлакатга газ етказиб беришни тўхтатди, Германия эса шу йил бошида Россия нефтини импорт қилишни тўхтатди.

Муқобил энергия манбаларига интилиб, мамлакат кўмир билан ишлайдиган электр станцияларини қайта очди, Германиянинг қолган учта атом электр станциясини ёпиш режаларини тўхтатди ва Норвегия ва АҚШ каби бошқа мамлакатлардан импорт қилинадиган табиий газни сақлаш ҳажмини оширди.

Давосдаги Жаҳон Иқтисодий Форумида иштирок этаётган Линднер тахминан 8 ой ичида Германияда янги суюлтирилган газ терминали қурилганини қайд этди.

Германия молия вазири инфратузилмага кўпроқ сармоя киритиш режалаштирилаётганини қўшимча қилди. "Бу Германия сиёсатидаги улкан ўзгаришларнинг бир мисоли, холос", — деб таъкидлади у.‌‌