Ғазо қамали оқибати: тез ёрдам машиналари қимирлай олмаяпти

Ғазо тез ёрдам машиналарининг сони учдан бирга тушиб қолди.

Фаластин Қизил ярим ой жамияти (FQYJ) раҳбарининг айтишича, янги таъминот етишмаслиги сабабли уларнинг Ғазодаги фаолияти бир неча кун ичида тўхтаб қолиши мумкин ва ёқилғи танқислиги туфайли тез ёрдам машиналарининг атиги учдан бири ишламоқда.

Бугун Ғазонинг энг заиф ҳудудларига ун ва бошқа ёрдам етказила бошланди, чунки Исроил баъзи юк машиналарини ўтказишга рухсат берди. Бироқ, Фаластин расмийларининг айтишича, бу 11 ҳафталик Исроил қамали натижасида юзага келган тақчилликни қоплаш учун етарли эмас.

Фаластин Қизил ярим ой жамияти президенти Юнус ал-Хатиб Женевада журналистларга ташкилотининг Ғазода фаолиятини қанча вақт давом эттира олиши ҳақидаги саволга шундай жавоб берди: "Бу вақт масаласи. Атиги бир неча кун бўлиши мумкин."

"Бизда ёқилғи тугаб бормоқда. Ҳозир фақат тез ёрдам машиналаримизнинг учдан бири ишламоқда," - дея қўшимча қилди у. Ал-Хатиб бензин билан ишлайдиган тез ёрдам машиналари аллақачон тўхтаганини, бироқ Бирлашган Миллатлар Ташкилоти томонидан тақдим этилган қуёш энергиясида ишлайдиган баъзи машиналар борлигини ҳам айтди.

Ал-Хатиб Исроил томонидан Ғазога шу пайтгача киритилишига рухсат берилган оз миқдордаги ёрдамни танқид қилиб, оломон ҳужумлари хавфи ҳақида огоҳлантирди.

"Менимча, бу одамларни ўлимга чорлаш билан баробар. Бу ерда одамлар очликдан қийналмоқда," дея таъкидлади у.