Франция Украинага 2 миллиард евролик ҳарбий ёрдам ажратади

Бу ҳақда Франция президенти Эммануел Макрон Парижда Украина етакчиси Влaдимир Зеленский билан учрашувдан сўнг маълум қилди.

"Янги етказиб бериладиган ҳарбий ёрдам таркибига танкка қарши ракеталар, “ер-ҳаво” таснифидаги ракеталар ҳамда дронлар киради", — дея аниқлик киритди Макрон.

Шу билан бирга, Франция етакчиси Москва Киев томонидан таклиф қилинган 30 кунлик оташкесимни ҳеч қандай шартларсиз қабул қилиши кераклигини таъкидлади.

"Бу таклифни рад этиш Россиянинг урушни давом эттириш ниятини кўрсатади. Россия Украинага барқарор тинчлик учун ўз шартларини қўймаслиги керак", — дея таъкидлади Франция раҳбари.

Шунингдек, Макрон бугун Франция ва Буюк Британия томонидан Украинани қўллаб-қувватлаш учун ташкил этилаётган “истак билдирганлар коалицияси” доирасида ҳамкорлари билан Украина уруши мавзусини муҳокама қилишини қўшимча қилди.