Flydubai рейси: Ҳиндистон фуқароси Моди билан видеомулоқот чоғида воқеалар ҳақида гапирди

Flydubai самолётида юз берган ҳужумдан омон қолган пилот воқеа тафсилотларини сўзлаб берди. Ҳиндистон фуқароси Смит Маччхар Ҳиндистон бош вазири Нарендра Моди билан видеомулоқот чоғида самолёт кабинасидаги воқеалар ҳақида гапирган.

Унинг айтишича, иккинчи пилот унга ҳужум қилганидан сўнг самолёт тезлик билан баландлик йўқотаётганини англаган.

«Мен ярадор ҳолда полда ётардим, аммо ўзимга охирги кучимни ишлатиб, эшикни ичкаридан очишим кераклигини айтдим», — деган Маччхар.

The Telegraph ёзишича, пилот вақт жуда оз қолганини тушунган. У эшик томон эмаклаб бориб, уни очишга муваффақ бўлган. Шундан сўнг бошқа одамлар кабинага кирган.

Ҳужум вақтида Маччхарнинг бўйни жиддий жароҳатланган, чап қўли эса деярли узилиб кетган. Касалхонада олинган кадрларда унинг боши ва қўллари боғлангани кўринади. Гувоҳларнинг айтишича, ҳужумдан кейин пилот кўп қон йўқотиб, ҳушини йўқота бошлаган. Унга йўловчилардан бири — стоматолог Шота Мусаев ёрдам кўрсатган.

Ҳиндистон бош вазири Нарендра Моди пилотнинг ҳаракатларини жасорат, вазминлик ва тез қарор қабул қилиш қобилиятининг намунаси деб атаган.

Ҳодиса 30 сентябрь куни эрталаб, Дубайдан Тель-Авивга йўл олган самолёт бортида содир бўлган. Иккинчи пилот капитанга кабинада ҳужум қилган. Унинг исми расман ошкор қилинмаган.

Исроил бош вазири Биньямин Нетаньяху маълум қилишича, самолёт қўнгандан сўнг ҳужум қилган шахс қўлга олиниб, сўроқ қилинган. Йўловчиларнинг айтишича, қўлга олиш вақтида у ўзини ўлдиришни сўраган.

Самолётни қутқаришда йўловчилар ва бортида бўлган бошқа пилотлар муҳим роль ўйнаган. Йўловчи Янив Хаю́н самолётнинг кескин пастга тушишини тўхтатганидан сўнг бошқа пилотлар бошқарувни ўз қўлига олган.

Натижада самолёт Саудия Арабистонида муваффақиятли қўнган. Бортдаги 180 кишининг барчаси тирик қолган.