Фарғонада эркак тушида хиёнат қилган аёлини пичоқлаб ўлдирди

Фарғонада ўз аёлини тушида кўрган хиёнати сабаб ўлдирган эркакка суд ҳукми ўқилди. Бу ҳақда вилоят Суди Матбуот хизмати хабар қилди.

Маълум қилинишича, ҳодиса Фарғона вилояти Марғилон шаҳрида содир бўлган. Тонгги соат 4:30 ларда эркак ухлаётган вақтда тушида ўз аёлининг хиёнатини кўрган ва ҳолатдан қўрқиб уйғониб кетади. Эркак ёстиғи тагида турган пичоқни олиб, ухлаб ётган аёлининг ҳаёти учун хавфли бўлган турли жойларига 13 марта урган.

Буни туш эканлигини англаган эр шифокорларга ўзи мурожаат қилган. Аммо, аёл тан жароҳатлари оқибатида вафот этган.

Судда ҳужжатларига кўра, судланувчи эркакнинг бу каби шубҳа-гумонлари воқеа содир бўлган куни пайдо бўлмаган. Аввалдан аёли билан гумонлар сабаб жанжаллашиб келган. Аниқланишича, уларнинг уч нафар фарзанди ҳам бўлган.

Жиноят ишлари бўйича Марғилон шаҳар судининг ҳукми билан эркакка Жиноят кодексининг 97-моддаси (қасддан одам ўлдириш)га асосан 16 йил озодликдан маҳрум қилиш жазоси тайинланди.