Европа комиссияси Украина учун ҳаво мудофааси ва ўқ-дориларга 6,1 миллиард евро ажратишни маъқуллади

Қўшимча маблағлар ҳаво ва ракета мудофааси тизимлари, ўқ-дорилар, дронлар ҳамда радиоэлектрон кураш воситаларини сотиб олишга йўналтирилади.

Европа комиссиясининг қарори Киевга, жумладан, Patriot тизимлари учун PAC-3 ракета-тутқичларини сотиб олиш имконини беради.

Маблағлар Европа Иттифоқининг Украинага 2026–2027 йилларда ёрдам кўрсатиш учун ажратилган кредити ҳисобидан берилади.

Европа комиссари Андрюс Кубилюснинг айтишича, Украина қиш бошлангунига қадар имкон қадар кўпроқ PAC-3 ракеталарини олишни режалаштирмоқда. Бунинг учун ҳамкор давлатлар Киевга ўз захираларидаги ракеталарни вақтинча бериш, кейин эса уларни келажакдаги етказиб беришлар ҳисобидан қайта тўлдириш схемаси кўриб чиқилмоқда.

Янги пакетни молиялаштириш учун Европа комиссияси дастурнинг стандарт қоидаларидан бир қатор истисноларни маъқуллади.

Янги қарордан сўнг Ukraine Support Loan дастури доирасида Европа Иттифоқининг 2026 йил учун Украинага тасдиқлаган мудофаа ёрдами ҳажми 28,3 миллиард еврога етди.

Ушбу маблағлар доирасида асосий харидлар, етказиб берувчилар ва қурол-яроғларни етказиб бериш муддатлари аллақачон белгиланган.