“4 соат ухлаб, 20 соат ишлайман”

Қирғизистон президенти унинг қабулига кира олмаган фуқаронинг шикоятига муносабат билдирди.

Қирғизистон президенти Садир Жапаров кунлик иш графиги ҳақида маълумот бериб, 4 соат ухлаши ва 20 соат ишлашини айтди. У бу ҳақда Жалолобод вилояти аҳолиси билан учрашувда маълум қилди.

Учрашув иштирокчиларидан бири Садир Жапаровнинг шахсий қабулига бир неча бор киришга урингани, бироқ президент билан учраша олмаганини айтган. Бунга жавобан Қирғизистон раҳбари барча фуқароларни шахсан қабул қилиш имконияти йўқлигини тушунтирди.

“Менинг қабулимга кира олмаганингизни айтишнинг ҳожати йўқ. Сизлар 7,5 миллионсиз, мен эса битта президентман. Олдимга келган ҳаммани қабул қилолмайман-ку. Менинг иш жадвалим бор. Шундоқ ҳам 24 соатнинг атиги 4 соатида ухлайман, қолган 20 соатини ишда ўтказаман”, деди у.

Садир Жапаров бундай жадвал билан ҳам барча масалаларни ҳал этишга вақти етмаслигини қўшимча қилди. Шунингдек, ҳуқуқ-тартибот идоралари ходимларининг ноқонуний хатти-ҳаракатлари устидан шикоят қилган фуқаронинг мурожаатини кўриб чиқишни топширди. Қирғизистон президенти билан учрашувда фуқаролар ер низолари, йўл қурилиши, ижтимоий инфратузилма ва давлат органлари ишига оид масалаларни кўтарди.