Путин: "Россия ва Украина келишувга эришиши мумкин"

Россия ва Украина ўзаро келишувга эришиши мумкин.

Бу ҳақда Россия президенти Владимир Путин «Вести» дастурига берган интервьюсида маълум қилган.

Унинг сўзларига кўра, Москва АҚШ делегацияси вакиллари билан музокаралар чоғида Киев билан уч томонлама музокараларни қайта бошлашга тайёрлигини билдирган.

«АҚШ маъмурияти вакиллари билан олиб борган музокараларимизга келсак, ҳа, биз уч томонлама алоқаларимизни қайта тиклашга тайёр эканимиз ҳақида келишиб олдик», — деди Путин.

Ушбу музокаралардан мақсад тинчлик келишувларига эришилганидан кейин Украина ва Россия хавфсизлигини таъминлаш масалаларини муҳокама қилиш эканини таъкидлади.

Путин, шунингдек, Россия хавфсизлиги бўйича музокаралар олиб борилаётганда бутун Европанинг хавфсизлик архитектураси ҳақида ҳам гапирмаслик мумкин эмаслигини қайд этди.

Аввалроқ, АҚШ президентининг махсус вакили Стив Уиткофф ҳамда Америка етакчисининг куёви Жаред Кушнер Москвада Владимир Путин билан музокаралар ўтказган эди. Учрашув якунлари бўйича Вашингтон маъмурияти вакили музокараларни «конструктив» деб баҳолаган.