Европа Комиссияси 15 ёшгача бўлган болаларнинг ижтимоий тармоқларга киришини тақиқламоқчи

Европа Комиссияси 15 ёшгача бўлган вояга етмаганлар учун ижтимоий тармоқлар ва видео алмашиш платформаларига киришни чекловчи янги қоидаларни таклиф қилади.

Бу ҳақда Politico нашри масала билан таниш манбага ва тегишли ҳужжатга таяниб хабар берди.

Нашрнинг хабар беришича, Европа Комиссияси яқин кунларда ёш чекловларини расмийлаштирадиган ва ижтимоий тармоқлар ва бошқа платформалар учун янги хавфсизлик талабларини жорий этадиган янги Европа Иттифоқи БОЛАЛАР (EU KIDS) тўғрисидаги қонунни тақдим этади.

Ҳужжатларга кўра, таклиф 15 ёшгача бўлган болалар учун ижтимоий тармоқларга назорат остида киришнинг кўп босқичли тизимини яратишга қаратилган. Таъкидланишича, бу тўлиқ тақиқни эмас, балки ёшга қараб маълум турдаги аккаунтлардан фойдаланишни англатади. Масалан, 13 ёшгача бўлган болалар учун аккаунтлар васийлар томонидан кузатилади ва "қатъий хавфсизлик стандартларига" жавоб беради. 13 ёшдан 15 ёшгача бўлган ўсмирлар учун нотаниш одамлар билан мулоқот қилиш ва қурилмалардан фойдаланиш вақтига чекловлар қўйилган "кириш" аккаунтлари, шунингдек, ота-она назорати функсиялари тақдим этилади. 15 ёшли ўсмирлар ўз аккаунтларини яратишлари мумкин бўлади.

Бу қарор Франция президенти Эммануэль Макрон каби ҳукумат раҳбарларининг бу масалани сиёсий кун тартибининг юқори қисмига олиб чиқиш учун бир неча ой давом этган кучли босимидан сўнг қабул қилинди. Австрия, Дания, Франция, Греция ва Испания болаларнинг ижтимоий тармоқларга киришини чекловчи миллий қонунларни қабул қилмоқда.

Европа Иттифоқи президенти Урсула фон дер Ляйен чоршанба куни Страсбургда парламент аъзоларига Европа Иттифоқининг ҳолати ҳақидаги нутқида батафсил маълумот бериши кутилмоқда.

Европа Иттифоқининг янги таклифи ижтимоий тармоқлар, видео алмашиш платформалари, онлайн ўйинлар, шунингдек, чатботлар ва СИ-ёрдамчиларига тааллуқли бўлади, аммо таълим воситаларини қамраб олмайди.