Францияцуз депутати СИ ёрдамида мусулмон аёлнинг ҳижобини олиб ташлади

Франциялик ўта ўнг депутат Жюльен Одуль ёш мусулмон аёлнинг суратидаги ҳижобни сунъий интеллект ёрдамида рақамли тарзда олиб ташлаганидан сўнг кескин танқидларга учради.

Чап қанот депутати Али Диуара томонидан эълон қилинган асл суратда аёл ҳижоб ва узун пушти кўйлакда тасвирланган эди. Одуль эса ушбу суратнинг сунъий интеллект орқали ўзгартирилган версиясини қайта эълон қилди. Унда аёл сочлари очиқ ҳолда, оқ майка ва шимда тасвирланган.

Депутат ўз постига «Француз эркинлиги!» деб изоҳ қолдирган.

Ушбу публикация Франциядаги «Миллий бирлашув» партияси ҳижоб кийишга нисбатан чекловларни кучайтириш ташаббусларини илгари сураётган бир пайтда пайдо бўлди.

Танқидчилар Одулини сунъий интеллектдан фойдаланиб, аёлнинг ташқи кўриниши қандай бўлиши кераклиги ҳақидаги ўз «эркинлик» тушунчасини бошқаларга сингдиришга уринишда айблади.