Европа Иттифоқи миссиясига тегишли вертолёт ҳалокатга учради

Босния ва Герцеговинада Европа Иттифоқининг EUFOR миссиясига тегишли CH-47 Chinook русумли ҳарбий вертолёт ҳалокатга учради.

Klix портали хабар беришича, ҳодиса мамлакатнинг Брчко шаҳри атрофида содир бўлган.

Дастлабки маълумотларга кўра, авиаҳалокат оқибатида 3 киши ҳалок бўлган, яна 12 нафар инсон турли даражада жароҳат олган.

Манбанинг таъкидлашича, ҳалок бўлганлар ва жароҳатланганларнинг барчаси Италия фуқаролари ҳисобланади.

Ҳодиса оқибатида маҳаллий тинч аҳоли орасида жабрланганлар қайд этилмаган. Шунингдек, инфратузилма объектларига зарар етмагани маълум қилинди.

Ҳозирда вертолётнинг қулашига нима сабаб бўлганини аниқлаш мақсадида тегишли текширув ишлари олиб борилмоқда.