Эрон ҳар қандай шартсиз музокараларга розилик билдирди — Велаёти

Эрон Ислом Инқилоби Олий Раҳбари Аятуллоҳ Али Хоманаийнинг халқаро ишлар бўйича маслаҳатчиси Али Акбар Велаётининг сўзларига кўра, Теҳрон ҳар қандай олдиндан шарт қўйилмаган, аммо миллий "қизил чизиқлар"ни бузмайдиган музокараларга розилигини билдирган.

Бу ҳақда Велаёти Покистон ички ишлар вазири Моҳсин Нақвий билан учрашувда маълум қилди. Учрашув пайтида Покистон бош вазири ва армия қўмондонининг Олий Раҳбарга йўлланган махсус хабарини ҳам етказишди.

Велаёти Эрон ва Покистон ўртасидаги муносабатларни "чуқур, тарихий ва ака-укача" деб атаб, икки давлат ўртасидаги ҳамкорликни кучайтириш зарурлигини таъкидлади.

АҚШ билан эҳтимолий музокаралар мавзусида сўз юритар экан, Велаёти шундай деди:

«Биз шартсиз ва Ислом Республикасининг қизил чизиқларига ҳурмат билдирувчи музокараларга қарши эмасмиз. Улар Эрон уран бойитишни тўхтатиши керак, деб айтмоқда — бу эса бизнинг асосий қизил чизиқларимиздан бири. Агар музокаралар шу каби шартга боғлиқ бўлса, бундай учрашувлар умуман бўлмайди».

Велаёти шунингдек, АҚШ президентининг сўзларини «мувофиқ келмайдиган ва ишончсиз» деб баҳолади.