Европа Иттифоқи Россия гази импортини, жумладан, «Шимолий оқим» газ қувури орқали етказиб беришни қайта тикламайди. Чунки амалдаги қонунчилик Россиянинг қазилма ёқилғиси етказиб беришдан тўлиқ воз кечишни назарда тутади.
Бу ҳақда Европа комиссияси матбуот хизмати раҳбари Паула Пиньо Брюсселдаги брифингда маълум қилди.
Украинадаги уруш тугаганидан кейин «Шимолий оқим» газ қувури фаолиятини қайта тиклаш имконияти ҳақидаги саволга жавоб берар экан, у шундай деди:
«Россиядан қазилма ёқилғилар, хусусан, газ импортини қайта тиклашга йўл қўймайдиган қонунчилик амалда».
Пиньо Россия дастлаб Европага газ етказиб беришни тўхтатганини эслатди. Унинг сўзларига кўра, Россиянинг қазилма ёқилғисига қарамлик жиддий заифликни юзага чиқарган, чунки энергетика ресурсларидан сиёсий босим ўтказиш воситаси сифатида фойдаланилган.
«Қазилма ёқилғиларни харид қилишда Россияга қарамлик қандай харажатларга олиб келишини жуда яхши биламиз. Бу етказиб беришлар қурол сифатида ишлатилди ва биз бунинг учун ўз баҳомизни тўладик», — деди у.
Европа комиссиясининг яна бир вакили Анна-Кайса Иткоnen Европа Иттифоқи Россия гази ва суюлтирилган табиий газ (СТГ) импортини босқичма-босқич тўхтатаётганини эслатди. Унинг айтишича, сўнгги етказиб беришлар 2027 йил охирига қадар якунланиши керак.
«Нима бўлишидан қатъи назар, биз Европа бозорида Россия гази ва суюлтирилган табиий газидан босқичма-босқич воз кечмоқдамиз», — деди у.
Ушбу баёнотлар АҚШ ва Россия ўртасида Украинадаги уруш тугаганидан кейин «Шимолий оқим» газ қувури фаолиятини қайта тиклаш ҳамда Россия газини Европага етказиб бериш истиқболлари муҳокама қилинаётгани ҳақидаги хабарлар фонида янгради.
Сунъий интеллект дунёдаги энг қиммат сурат муаллифлигини шубҳа остига қўйди
Ўзбекистон Самарқанд ҳақидаги баёнотлар сабаб Эронга норозилик нотаси топширди
АҚШнинг Россия бўйича қарори Киевнинг умидларини пучга чиқарди
