Дронлар ҳужумидан сўнг «Лукойл»нинг йирик нефть заводи ишини тўхтатди

«Лукойл»га қарашли «Нижегороднефтеоргсинтез» (НОРСИ) нефтьни қайта ишлашни 5 апрель куниги дронлар ҳужумидан сўнг тўхтатган. Бу ҳақда Reuters агентлигига соҳадаги икки манба хабар берган.

Қайд этилишича, Россияда қайта ишлаш ҳажми бўйича 4-ўринда турадиган ва жумладан Москва ҳудудини ёқилғи билан таъминлайдиган мазкур йирик НПЗ якшанба куни хом ашёни қабул қилиш ва қайта ишлашни тўхтатган.

6 апрелдан бошлаб корхона Санкт-Петербург товар-хом ашё биржасида бензин, дизель ёқилғиси ва мазут савдосини ҳам тўхтатган.

«НОРСИ биржа шартномалари бўйича бензин ва дизель юкламайди, дастлабки маълумотларга кўра апрель ойи охиригача. Биржа савдолари ҳам шу муддатгача бўлмайди. Завод нефть базасидан автотранспорт орқали олиб чиқиш ҳам тўхтатилди», — деган Reuters манбаларидан бири.

Йиллик қуввати 17 миллион тонна нефть бўлган завод ўтган йили 5 миллион тоннадан ортиқ бензин ва шунча миқдорда дизель ишлаб чиқарган. У Украина томонидан баҳорда амалга оширилган дрон ҳужумлари натижасида фаолияти тўхтаган учинчи корхона бўлди.

Бундан аввал, 21 март куни «Роснефть»га қарашли Саратов НПЗ дрон ҳужуми натижасида ягона бирламчи қайта ишлаш ускунаси ишдан чиққанидан сўнг нефть қабул қилишни тўхтатгани хабар қилинган эди. Шунингдек, 26 март куни Ленинград вилоятида жойлашган «Киришинефтеоргсинтез» («Кинеф») заводи ҳам фаолиятини тўхтатган. У Россияда қайта ишлаш ҳажми бўйича 2-ўринни, Европа қисмида эса 1-ўринни эгаллайди.

Манбаларга кўра, йиллик қуввати 20 миллион тонна бўлган «Кинеф» заводи ишини фақат қисман — 60–75 фоиз қувват билан тиклаши мумкин бўлиб, бу жараён тахминан бир ой вақт олади.