Дональд Трамп исроилликларни сайловда Нетаньяхуга овоз беришга чақирди

АҚШ президенти Дональд Трамп Исроил фуқароларини бўлажак сайловларда мамлакат бош вазири Биньямин Нетаньяҳуни қўллаб-қувватлашга чақирди. У Исроил ҳукумати раҳбарининг фаолияти ва Вашингтон билан ҳамкорлигини юқори баҳолади.

Америка етакчиси бу ҳақда ўзининг Truth Social ижтимоий тармоғидаги саҳифасида ёзди.

Трамп бир ҳафта олдин ҳам Нетаньяҳуни очиқ қўллаб-қувватлаганини эслатиб, уларнинг ҳамкорлиги ҳарбий соҳада сезиларли натижаларга эришиш имконини берганини таъкидлади.

«Душманларимиз ҳам қўшиб айтганда, ҳаммага маълумки, Биби билан муносабатларимиз жуда яхши ва биз биргаликда ғалабаларга эришдик», — деб ёзди у.

АҚШ президенти Венесуэлага қарши ҳарбий операцияни тилга олиб, уни тарихдаги энг муваффақиятли операциялардан бири деб атади. Шунингдек, Эронга қарши ўтказилган «Midnight Hammer» («Тунги болға») ва «Epic Fury» («Эпик ғазаб») операцияларини ҳам қайд этди.

Трампнинг таъкидлашича, биринчи операция Эроннинг ядровий қуролга эга бўлишига йўл қўймаган, иккинчи операция натижасида эса мамлакат ҳарбий-денгиз ва ҳарбий-ҳаво кучларидан маҳрум бўлган.

Америка етакчиси, шунингдек, Эроннинг қуролли кучлари ва иқтисодиёти оғир аҳволда эканини, инфляция 301 фоизга етганини ҳамда денгиз блокадаси нефть етказиб беришга тўсқинлик қилаётганини билдирди. Унинг сўзларига кўра, Эрон ҳарбий ва сиёсий раҳбариятининг икки даражасидан ҳам маҳрум бўлган.

«Сайлов участкаларига борганингизда, Биби уруш даврида ўзини кўрсатган ажойиб бош вазир бўлганини ёдда тутинг», — дея таъкидлади Трамп.

У, шунингдек, Исроил ва АҚШнинг рақиблари ушбу мамлакатларни мос равишда «кичик шайтон» ва «катта шайтон» деб атаганини эслатди.

«Бутун дунё бўйлаб “Америкага ўлим, Исроилга ўлим” деган шиорлар энди янграмаслиги керак ва бундай бўлмайди ҳам. Биби Нетаньяҳуни бош вазирликка сайлаш учун овоз беринг. Биз бошлаган ишимизни охирига етказишимиз керак!» — дея хулоса қилди АҚШ президенти.