Бу санкциялар Путинни тўхтатадими? АҚШдан навбатдаги қадам!

АҚШ Сенати Россияга қарши 500 фоизлик иккиламчи божлар билан таҳдид қилмоқда.

Демократ сенатор Ричард Блюментал ва республикачи Линдси Грэм томонидан таклиф этилган янги қонун лойиҳасида Россияга қарши кескин иқтисодий чоралар кўриш назарда тутилган. Агар Москва яқин кунларда Украинада тинчлик бўйича қабул қилиб бўлмайдиган шартлар билан чиқса, бу мамлакат 500 фоизлик санкциявий тарифларга дуч келиши мумкин.

Қонун ташаббускорларининг баёнотида қайд этилишича, мазкур лойиҳага 81 сенатор аллақачон ҳаммуаллиф сифатида қўшилган. Улар АҚШ давлат котиби Марко Рубионинг сўзларига таяниб, Россия яқин кунларда тинчлик шартлари тўғрисидаги таклифини тақдим этиши кутмоқда.

"Бу ҳужжат мазмуни Россиянинг тинчликка қай даражада жиддий муносабатда эканини кўрсатиб беради. Биз ушбу жараён яна аввалгилари каби бўлишини тахмин қиляпмиз. Агар шундай бўлса, Сенат Россияга нисбатан кескин чоралар кўради. Шу нуқтаи назардан, бизда Россиянинг Украинага босқини учун жазо сифатида тайёрланган санкциялар лойиҳасини қўллаб-қувватлаётган 81 сенатор борлигидан мамнунмиз", дейилади сенаторларнинг қўшма баёнотида.

Қўшма Штатлар Конгрессида Россияга қарши янги қатъий санкциялар тўғрисидаги қонунни овозга қўйиш эҳтимоли ҳақида гап-сўзлар Трамп ва Путин ўртасидаги сўнгги мулоқотдан сўнг пайдо бўлди. Ўша суҳбатдан кейин Трамп Россияга қарши янги санкциялар жорий қилиш нияти йўқлигини билдирган эди. Кремл эса дастлабки шартларсиз ўт очишни тўхтатишга қарши чиқиб, олдиндан музокаралар ўтказишни талаб қилмоқда, бу позицияни Трамп ҳам ўз чиқишларида қўллаб-қувватлаган эди.

Шу билан бирга, агар Конгресс санкциялар лойиҳасини қабул қилса ҳам, Трамп унга вето қўйиши мумкин. Бундай вазиятда унинг ветоcини бекор қилиш учун қонун лойиҳаси Сенат ва Қонунчилик палатасида учдан икки қисм овоз йиғиш эҳтимоли кам, чунки Конгресснинг ҳар иккала палатасида республикачилар кўпчилик ўринга эга.