Буюк Британия Япония билан эркин савдо режимини ўрнатиш тўғрисида келишувга эришди.
Бу Лондоннинг Brexit’дан кейинги биринчи йирик савдо шартномаси бўлди, деб ёзмоқда Интерфакс.
"Бирлашган Қироллик ўзини мустақил мамлакат сифатида Япония билан ҳамкорликни 15,2 миллиард фунт стерлинг (19,5 миллиард доллар)га оширувчи Буюк Британия учун биринчи йирик келишувга айланган эркин савдо шартномаси билан таъминлади", дейилади Буюк Британиянинг ташқи савдо вазирлиги баёнотида.
Таъкидланишича, шартнома бугун, 11 сентабрь куни Буюк Британиянинг ташқи савдо вазири Лиз Трасс ҳамда Япония ташқи ишлар вазири Мотэги Тосимицу томонидан видеоқўнғироқ давомида ишлаб чиқилган.
Қайд этилишича, Лондон ушбу битимдан Японияга экспорт қилувчи инглиз компанияларининг аниқ афзалликларга эга бўлиши ҳамда Буюк Британияда янги иш ўринлари яратилишини кутмоқда.
Шунингдек, баёнотга кўра, келишув Буюк Британиянинг Транстинчокеани савдо шериклиги тўғрисидаги битимга қўшилишидаги муҳим қадам сифатида кўрилмоқда.
Маълум қилинишича, келишув натижасида Буюк Британия иқтисодиётига тахминан 1,9 миллиард доллар келиши, шунингдек, мамлакат ишчиларининг иш ҳақи узоқ муддатли истиқболда 1 миллиард доллардан ошиши кутилмоқда.
