Болгария қирғоқларида дронлар икки савдо кемасига ҳужум қилди, улардан бири чўкиб кетди

Ҳодиса Болгариянинг эксклюзив иқтисодий ҳудудида, қирғоқдан тахминан 110–150 километр узоқликда юз берган. Reuters'нинг ёзишича, бу Россия–Украина уруши бошланганидан бери Болгария сувларида фуқаролик кемаларига қарши қайд этилган илк дрон ҳужуми бўлиши мумкин.

Ҳужумга учраган кемалар — Палау байроғи остидаги Аble ва Того байроғи остидаги Alfa Watan. Ҳар икки кемадан ёрдамга чақирув сигнали келиб тушган. Кейинроқ Alfa Watan Болгария чегара полицияси радарларидан йўқолган.

Аble кемасидаги 18 кишилик экипажни яқин атрофдаги юк-йўловчи кемаси қутқарган. Экипажнинг 11 нафари Туркия, 7 нафари Ҳиндистон фуқаролари. Икки киши жароҳатланган: бири куйган, иккинчиси бошидан яраланган. Улар Варна шаҳридаги ҳарбий госпиталга олиб кетилган.

Дронлар кимга тегишли экани ҳозирча расман аниқланмаган. Reuters манбасининг дастлабки баҳосига кўра, ҳужум Россия томонидан амалга оширилган бўлиши мумкин.

Ҳужумдан кейин Болгария бош вазири Румен Радев Мудофаа вазирлиги, хавфсизлик хизматлари ва бошқа идоралар вакиллари иштирокида фавқулодда йиғилиш чақирди. У воқеани “мутлақо қабул қилиб бўлмайдиган ҳужум ва халқаро денгиз ҳуқуқининг қўпол бузилиши” деб атади.

Радевнинг айтишича, омон қолган Аble кемаси жанубга буғдой олиб кетаётган эди. Шимолга йўл олган Alfa Watan кемасида қандай юк бўлгани эса ҳозирча номаълум