«Барселона» президенти Ла Лигага кескин мурожаат қилди

«Барселона» клуби президенти Жоан Лапорта жамоа футболчилари Дани Ольмо ва Пау Викторнинг Ла Лигада рўйхатдан ўтказилмаётганига муносабат билдирди.

«Биз ҳали Ла Лигага жавоб қайтарамиз. Улар бизнинг манфаатларимизга ҳужум қилишди.

Олдин бу трансферларни маъқуллаган ташкилот нимага бирдан қарорини ўзгартириб қолгани қизиқ. Демак, Ла Лига дастлаб хато қилган бўлиб чиқиши керак.

Бугун ўта муҳим учрашувда майдонга тушишимиз керак. Қарор эса айни шу куни эрталаб эълон қилинмоқда. Майдонда енгишнинг иложи бўлмаяпти ва энди бизга унинг ташқарисида ҳам ҳужум бошлашмоқда.

Менга ишонинг, Тебас (Ла Лига президенти) ва унинг ташкилотига берадиган жавобим кучли бўлади. Клуб президенти сифатида мен бунга шунчаки жим қараб тура олмайман», – деди «Барселона» президенти Лапорта.

Аввалроқ «Барселона» молиявий фэйр-плей қоидаларига тўғри келмаслиги сабаб Дани Ольмо ва Пау Викторни Ла Лигада рўйхатдан ўтказа олмаслиги маълум қилинганди.