АҚШда самолёт двигатели ёниб, фавқулодда қўнишни амалга оширди

FedEx компаниясининг юк ташувчи самолёти ҳавога кўтарилганидан кўп ўтмай Ньюарк Либерти (Нью-Жерси) халқаро аэропортига фавқулодда қўнди, деб хабар беради Fox News.

Телеканал маълумотларига кўра, двигатель ёнишига қуш билан тўқнашув сабаб бўлган.

Гувоҳларнинг сўзларига кўра, воқеа вақтида кучли шовқин эшитилган.

Аэропорт хавфсизлик нуқтаи назаридан вақтинча ёпилган, бироқ кейинроқ қайта очилган. FedEx компанияси Индианаполисга кетаётган Boeing 767 самолёти парвоз пайтида қушни уриб юборганини тасдиқлади.

АҚШ Федерал Авиация бошқармаси (FАА) воқеа юзасидан тергов олиб бормоқда.