АҚШда мустақил сайловчиларнинг ярми Трампга қарши овоз бериш ниятида

Reuters ва Ipsos томонидан ўтказилган янги сўров натижаларига кўра, АҚШда мустақил сайловчиларнинг ярми Конгрессга оралиқ сайловларда Дональд Трампга қарши овоз беришини билдирган. Бу ҳақда Tasnim News хабар берди.

Сўровда Трампнинг фаолиятини қўллаб-қувватлаш даражаси 32 фоизни ташкил этган. Бу унинг президентлик давридаги энг паст кўрсаткичлардан бири ҳисобланади.

Конгресс устидан назорат қайси партия қўлида бўлиши кераклиги ҳақидаги саволда эса демократлар 46 фоиз овоз билан республикачилардан олдинда. Республикачиларни қўллаб-қувватлаганлар улуши 38 фоизни ташкил этган.

Мустақил сайловчиларнинг 50 фоизи овоз бериш орқали Трампга қарши эканини билдирмоқчи эканини айтган. Фақат 13 фоизи ўз овозини президентни қўллаб-қувватлаш сифатида баҳолашини билдирган.

Сўров иштирокчиларининг 78 фоизи яшаш харажатларининг ошишини овоз беришдаги асосий омил сифатида кўрсатган. Бу масалани қайси партия самаралироқ ҳал қилиши мумкинлиги ҳақидаги саволда демократлар 43 фоиз, республикачилар эса 32 фоиз овоз олган.

Шунингдек, демократлар сайловларда иштирок этишга кўпроқ қизиқиш билдирган. Уларнинг 49 фоизи овоз беришда қатнашишга жуда қизиқишини айтган бўлса, республикачилар орасида бу кўрсаткич 33 фоизни ташкил этган.

АҚШдаги оралиқ сайловларда Вакиллар палатасининг барча 435 ўрни ва Сенатдаги 100 ўриндан 35 таси учун овоз берилади. Айни пайтда республикачилар Вакиллар палатасида 218, демократлар эса 214 ўринга эга. Сенатда эса республикачилар 53, демократлар 47 ўринни назорат қилмоқда.

Демократлар Сенатда кўпчиликни қўлга киритиши учун республикачилар эгаллаб турган камида тўртта ўринни қўлга киритиши керак.

Сўровда Трампнинг Эронга қарши уруш ва Канада билан тарифлар бўйича можаро фонида пасайган рейтинги, шунингдек, яшаш харажатларининг ошиши демократларнинг сайловдаги имкониятларига таъсир қилиши мумкин бўлган омиллар сифатида қайд этилган.