АҚШ ХАМАС раҳбариятининг олти нафар аъзосига қарши санкциялар жорий қилди

Америка ҳукумати Фаластиннинг ХАМАС ҳаракати раҳбариятининг олти нафар вакилига қарши санкциялар жорий қилди.

Бу ҳақда АҚШ молия вазирлиги тарқатган баёнотда айтилади.

Ҳужжатга кўра, чекловлар ХАМАСнинг олти нафар юқори мартабали аъзоларига нисбатан қўлланилади. Улар орасида ҳаракатнинг хориждаги вакиллари ва ҳаракатнинг жангари қаноти ҳисобланган Иззиддин ал-Қассам бригадалари аъзоси ҳам бор. Бундан ташқари, санкциялар рўйхатига ХАМАС манфаатлари йўлида маблағ йиғиш билан боғлиқ шахслар, шунингдек, “Ғазога қурол контрабандаси” билан алоқадор шахслар ҳам киритилган.

Америка томонига кўра, бу шахслар террорчилик фаолиятини тарғиб қилади, шунингдек, Ғазо секторига пул ва товарлар жўнатиш ишларини мувофиқлаштиради.

“АҚШ Молия вазирлиги ХАМАСнинг қўшимча даромад олиш борасидаги саъй-ҳаракатларини тўхтатишга содиқ қолади ва гуруҳнинг террорчилик фаолиятига ёрдам берганларни жавобгарликка тортади”, — деди департамент.

Эслатиб ўтамиз, санкциялар рўйхатига киритиш АҚШдаги активларни музлатиш ва Америка фуқаролари ва компанияларининг унинг айбланувчилари билан бизнес юритишини тақиқлашни англатади.