АҚШ вице-президенти Германияда Алис Вайдел билан учрашди

АҚШ вице-президенти Германиядан жўнаб кетишдан олдин “Германия учун муқобил” партияси етакчиси билан учрашди

Вице-президент Жеймс Дэвид Вэнснинг вакили унинг Алис Вайдел билан учрашгани ва учрашув ярим соат давом этгани ҳақидаги маълумотни тасдиқлади. Қайд этилишича, учрашувда Украинадаги уруш, Германиянинг ички сиёсати ва сўз эркинлиги мавзулари муҳокама қилинган.

Аввалроқ АҚШ вице-президенти Мюнхен хавфсизлик конференциясида нутқ сўзлаб, немис сиёсатчиларини "умумий қадриятлардан чекиниш" ва ўз сайловчилари билан ишлашни истамасликда айблаган эди. Вэнснинг сўзларига кўра, катта қисми “Германия учун муқобил” (АfD) партиясига овоз бераётган немис фуқароларининг фикри ҳам эшитилиши лозим.

Унинг бу баёноти Германиянинг амалдаги канцлери Олаф Шолц ва ХДИ/ХСИ блоки етакчиси Фридрих Мерц томонидан кескин танқид қилинди. Ўта ўнг “Германия учун муқобил” партияси Украинага ёрдамни тўхтатиш ва Россия билан алоқaларни тиклаш тарафдори ҳисобланади. Аввалроқ партияни ижтимоий тармоқларда миллиардер Илон Маск ҳам қўллаб-қувватлаган эди.