АҚШ ва Украина музокаралари бугун кечқурун бошланади – Reuters

Агентлик маълумотларига кўра, Қўшма Штатлар ва Украина делегациялари Саудия Арабистонида бугун кечқурун музокараларни бошлайди.

Ушбу учрашув душанба куни бўлиб ўтадиган АҚШ ва Россия музокараларидан олдин ўтказилади. Музокараларнинг асосий мавзуси ўт очишни қисман тўхтатиш масаласи бўлади.

Шу билан бирга, The New York Times нашри украиналик манбасига таяниб хабар беришича, Киев вакиллари АҚШ делегацияси россияликлар билан учрашгандан кейин яна музокаралар ўтказиши мумкин.

Украина делегациясига мудофаа вазири Рустем Умеров бошчилик қилади. Аввалроқ Украина Ташқи ишлар вазирлиги томонлар "ўт очишни тўхтатишнинг турли режимлари, оташкесимни қандай назорат қилиш, умуман олганда, унинг доирасига нималар кириши" каби масалаларни аниқлаштирилиши кераклигини билдирганди.

Ўз навбатида, Кремл Саудия Арабистонидаги музокараларда Қора денгиз бўйича келишув ҳам муҳокама қилинишини ма’лум қилган.