Омск шаҳрининг Киров туман суди Россия президенти Владимир Путинни Адолф Гитлерга ўхшатган тасвирлар жойланган сайтнинг 12 та саҳифасини мамлакатда тақиқланган деб эълон қилди.
Тақиқ остига Путинга фюрернинг мўйлови ва соч турмаги фотомонтаж қилинган суратлар тушди. Шунингдек, суд "Путлер капут" ёзувларини ҳам тақиқлади. "Верстка" нашрининг эътибор беришича, бундай ёзувлар, хусусан, норозилик намойишлари кадрларида учрайди.
Жумладан, суд блогер Иля Варламовнинг "Путлер, қўрғошин билан меҳмон қилишларидан олдин заҳар ич" деган ёзувли плакатни ушлаб турган аёлнинг фотосуратини тақиқлади. Бундан ташқари, Павел Деревянко иштирокидаги "Гитлер капут!" фильмидан олинган кадрлар ҳам чекловлар остига тушди.
Тақиқланган рўйхатга «Стихи.ру» сайтидаги Путиннинг сурати жойлаштирилган саҳифа ҳам киритилди. "Россияни шармандаликдан қандай қутқариш мумкин" деб ёзилган тасвирда у бошига тўппонча тираб турибди. Шунингдек, «Крокодил» журнали муқоваси услубида ишланган расм эълон қилинган LiveJournal саҳифаси ҳам тақиқланди.