АҚШ Туркманистон газининг транскаспий йўналишлари орқали экспорт қилинишини қўллаб-қувватлайди

Қўшма Штатлар Туркманистон табиий газининг транскаспий йўналишлари бўйлаб экспортини диверсификация қилишни қўллаб-қувватлайди.

Бу ҳақда АҚШ Давлат котиби Марко Рубио ва Туркманистон ташқи ишлар вазири Рашид Мередов ўртасидаги Вашингтондаги учрашувдан кейинги баёнотда айтилган.

Рубио Мередовга "сўнгги савдо битимлари бўйича эришилган ютуқлар" учун миннатдорчилик билдирди. Томонлар энергетика, хавфсизлик ва савдо соҳаларидаги ҳамкорликни янада кенгайтириш йўлларини муҳокама қилишди.

"Давлат котиби Туркманистоннинг транскаспий йўналишлари бўйлаб табиий газ экспортини диверсификация қилишни АҚШнинг қатъий қўллаб-қувватлашини билдирди", дейилади баёнотда.