АҚШ Шимолий Корея фуқароларини шахсни ўғирлаш ва пул ювишда айблади

АҚШ суди Шимолий Кореянинг 14 фуқаросини шахсини ўғирлаш, пул ювиш ва санкцияларни бузишда айблади.

Бу ҳақда АҚШ Адлия вазирлигининг пресс-релизида айтилади.

Департамент маълумотларига кўра, Шимолий Корея фуқаролари ўзларининг ҳақиқий шахсини яшириб, масофадан туриб Америка компаниялари ва нодавлат нотижорат ташкилотларига IT-мутахассис сифатида ишлаш учун ариза топширган.

Гумонланувчилар ишга ёллаш пайтида ўғирланган шахсий маълумотлардан фойдаланган ёки интервьюларни якунлаш ва масофавий иш учрашувларида қатнашиш учун АҚШ фуқароларига пул тўлаган.

Шундан сўнг ҳужумчилар Америка компанияларининг махфий маълумотларига кириш имконига эга бўлиб, агар иш берувчилар керакли миқдорни тўламаса, уларни интернетга жойлаштириш билан таҳдид қилишган.

Вазирлик маълумотларига кўра, олти йил ичида гумондорлар Пхеньянга юборилган камида 88 миллион доллар олган.