АҚШ Россия Мудофаа вазирлигининг бир нечта тузилмасига, шунингдек, Россиянинг иккита компанияси ва беш нафар фуқаросига қарши санкциялар жорий этди. Бу ҳақда Давлат департаменти хабарида айтилади.
Санкциялар остига Россия Мудофаа вазирлигининг Бош ракета-артиллерия бошқармаси, Россия Қуролли Кучларининг 1061-моддий-техника таъминоти маркази, Россия Мудофаа вазирлигининг Истиқболли қўшинлараро тадқиқотлар ва махсус лойиҳалар бошқармаси ҳамда Россия Қуруқликдаги қўшинлари тушди. Санкциялар уларнинг ҳар қандай ҳуқуқий ворислари, бўлинмалари ёки шўъба корхоналарига нисбатан ҳам татбиқ этилиши таъкидланмоқда.
Бундан ташқари, санкциялар рўйхатига Россиянинг икки компанияси International Invest Company ва Gedion Alpha Company, шунингдек, Россия Федерацияси фуқаролари Александр Приходко, Андрей Гусев, Андрей Косолапов, Владислав Морозик ҳамда Сергей Цибарев киритилди.
АҚШ Давлат департаментининг билдиришича, ушбу ва бошқа хорижий шахслар Эрон, Шимолий Корея ва Сурияга нисбатан оммавий қирғин қуролларини тарқатмаслик тўғрисидаги қонунга мувофиқ чеклов чораларини қўллашни тақозо этадиган фаолиятни амалга оширган.
Санкциялар 2026 йил 24 июлдан кучга кирди ва АҚШ Давлат департаменти бошқача қарор қабул қилмаса, икки йил давомида амал қилади.
Ҳужжатга кўра, АҚШ идораларига ушбу рўйхатда кўрсатилган шахслардан товарлар сотиб олиш, уларга ёрдам кўрсатиш ёки қурол сотиш тақиқланади.
Саудия Арабистони валиаҳд шаҳзодаси Трампни Эронга қарши бошқа ҳужумлар уюштирмасликка чақирди
Хитой электромобиллари омборларда тўпланиб қолмоқда
Флоренцияда “биринчи Cоcа-Cola” рецепти топилди
