АҚШ Россияга қарши янги санкциялар пакетини тайёрлаб қўйган, бироқ ҳозирча уларни жорий этмаяпти

АҚШ Россияга қарши янги санкциялар пакетини тайёрлаб қўйган, бироқ ҳозирча уларни жорий этмаяпти. Бу ҳақда Bloomberg хабар берди.

Нашрга анонимлик шарти билан изоҳ берган манбаларнинг айтишича, Вашингтон Москвага қарши қўшимча санкцияларни тайёрлаб қўйган, аммо ҳозирча бу чекловлар қабул қилиниши кутилаётгани ҳақида аниқ белгилар йўқ.

Ўтган йилнинг декабр ойи ўрталарида Bloomberg вазиятдан хабардор манбаларга таяниб, АҚШ Россия ва Украина ўртасида тинчлик келишуви муваффақиятсиз якунланган тақдирда жорий этилиши мумкин бўлган янги санкцияларни тайёрлаётгани ҳақида ёзган эди. Унга кўра, вариантлар орасида Россия нефтини ташиётган танкерларнинг “соя флоти” кемаларини таъқиб қилиш, шунингдек, бундай операцияларга кўмаклашаётган трейдерларга қарши чоралар кўриш ҳам бор.

Шу билан бирга, Европа Иттифоқи ҳам Россиянинг Украинадаги махсус ҳарбий операцияси бошланиши санасига боғлаб эълон қилиниши режалаштирилган янги санкциялар пакетини тайёрлаган. Ҳозирча ЕИнинг 20-санкциялар пакетини қабул қилиш кечиктирилмоқда, бироқ Еврокомиссия уни исталган кунда тасдиқлаши мумкин.